الخميس, 11 مارس 2021 10:54 مساءً 0 4563 0
النجمة الصاعدة كنزى مدبولى فى حوار صحفى مع الإعلامية سنديا أيمن
النجمة الصاعدة كنزى مدبولى فى حوار صحفى مع الإعلامية سنديا أيمن
كتبت سنديا أيمن :
 
خفيفة الظل المحبوبة النجمة الصاعدة كنزى مدبولى، ضيفتنا اليوم مميزة بكل المقاييس، عندما يجتمع الفن و الموهبة و الرِّقة و الطموح فى شخصٍ واحد، برغم صِغر سنها إلا أنها حققت نجاح مرموق و أصبح لها جمهور عريض من المعجبين والمعجبات ينتظروا منها كل جديد.
 
 
س١- فى البداية نود أن نتعرف أكثر على شخصية كنزى مدبولى ؟
- أنا كنزى محمد مدبولى، ٢٣ سنه، ولدت بالإسكندرية و مقيمة فيها، كنت فى مدرسة سان ڤنسان، بحب الإنجليزى أوى و بحب إعلام، قررت أدخل أكاديمية لأن مفيش إعلام فى إسكندرية، ولازم أتبع حلمى و فى نفس الوقت أكون مرتاحة و جنب أهلى.
س٢- لكل موهبة بدايات فكيف كانت بدايتِك ؟
- من طفولتى بحب أمثل، إتعرضت لإحباطات كتير من عائلتى و كل الناس حواليا، قالوا صعب أمثل وكانو فاكرين إنى بقول أى كلام عشان كنت صغيرة، الشئ اللى كان بيحفزنى فى كل فترة صعبة إيمانى إنى فى يوم من الأيام همثل و أعمل إللى أنا بحبه، كان بيخلينى أتخطى صعوبة المدرسة وخصوصاً ثانوية عامه و الكلية،
أول تجارب ليا فى التمثيل كانت من خلال الفيديوهات إللى بقدمها.
س٣- هل كنتِ تخططين لهذا النجاح أم لعبت الصدفة دور فى حياة كنزى مدبولى ؟
- ماكنتش بخطط لكن كنت بحلم أوصل، فى الأول كنت بعمل فيديوهات عن الأمراض النفسيه، أنا مريت بتجربة إكتئاب، كان عندى وسواس قهرى و ماكنش حد بيساعدنى و ده دخلنى فى إكتئاب، لما عرفت و عديت شويه من الإكتئاب قررت أساعد الناس دى كانت بدايتى فى الفيديوهات، فترة الحظر فكرت إن أنا بحب التمثيل، جربت أعمل تيك توك، بعدها بقيت أعمل إسكيتشات بتاعتى و لقيت نجاح حلو.
س٤- ماهى الصعوبات التى واجهتيها فى تحقيق هدفك ؟
- كان نفسى أمثل، و مفيش فرص فى إسكندرية، مفيش ورش تمثيل، كنت عايزه أمثل و أحقق حلمى و عايزه أتعلم فى إسكندرية عشان مش هينفع أسافر، مازلت أواجه نفس الصعوبات، 
لما قررت أبدأ أون لاين فى الأول أهلى مكانوش موافقين،
لكن لما بدأت لقيت ردود فعل من الناس حلوه و دعمونى.
س٥- ماذا تمثل لكِ التعليقات السلبية و كيف تتعاملين معها ؟
- كتير مابتأثرش، أنا بشوف أكثر من ٩٥٪ من التعليقات إيجابية، قليل أوى لما بتكون حاجات سلبية، لكن لو شخص إتعدى حدوده بتعصب، 
أنا إنسان مسالم و بحب أنشر إيجابية و سلام نفسى و مش برد إسائة بإسائة.
س٦- وجهى كلمة لأكثر شخص قام بإحباطك ؟
زمايلى فى ثانوية عامة لما إبتديت أتكلم و أقول إنى عايزه أكون ممثلة و مخرجة كان معظم تعليقاتهم إنتى مش هتطلعى حاجه، الحمد لله أنا دلوقتى مش عايزه أوجهلهم حاجه أنا مش مهتمه هما شايفين إيه.
لكن أنا عايزه أوصل جمله للناس إللى زيى بيحلموا بحاجه و فى ناس بتحبطهم ؛ كملوا زى ما إنتو و ماتتأثروش بأى حد يحبطكوا.
أمير عيد قال فى حفلة قبل كده " لو إنت مصدق نفسك و بتحب إللى إنت بتعمله إمشى ورا حلمك و مالكش دعوه بكلام الناس " كنت بحب فرقة كايروكى أوى، هما كمان فى الأول كانو بيقابلوا نقد شديد أوى و حققوا نجاح.
س٧- ماهى أهدافك فى الحياة ؟
- أكبر هدف ليا أبقى وسط عائلتى خطيبى و أمى و أبويا و أخويا وأولاد خالتى، هما أهم حاجه فى حياتى، بحب أشاركهم، بحكى عن خطيبى فى بوستات كتير و فيديوهات كتير بيطلع فيها أولاد خالتى، لأن أنا بحب يكونوا جزء من أى نجاح أنا بعمله، أول هدف ليا أحافظ عليهم و يبقوا مبسوطين و كويسين.
تانى هدف أسيب أثر فى ناس كتير يقدروا يعيشوا أحسن، لو عرفت أعمل فلوس أكيد هساعد ناس كتير، أنا عايزه أساعد الناس فِكرياً، أبسط حاجه إن أنا أضحكهم مثلاً.
من أهدافى أدخل مجال السنيما و أمثل أدوار عجبانى أدوار أبقى نفسى أتفرج عليها.
س٨- من أكثر شخص يقوم بدعمك فى الوصول لأهدافك ؟
- فراس خطيبى، من أول يوم عرفتو، هو أول واحد مايضحكش عليا لما أقوله أنا عايزه أكون ممثله، كل مره بيدعمنى، هو شخصية طموحه، إتعلمت منه أكون طموحه، بعديه عائلتى بيدعمونى و بيفرحوا دايماً بنجاحى.
س٩- من هو قدوتك ؟
- أى حد ناجح، لما بشوف نجاح أى حد بفرح خصوصاً لما بشوف نجاح ممثلين أو شخص عنده موهبة وقِدر يوصل لحلمه ، كل الناس دى قدوتى، ناس كتير ببصلها و نفسى أبقى زيهم، مثلاً الممثل آسر ياسين لأنه بيعمل كل الأدوار إللى نفسى أعملها و بيمثلها بطريقه حلوه جداً و إبتدى بنفسه.
س١٠- فى النهاية بماذا تحبى أن تنهى معنا الحوار ؟
- مبسوطه أوى إن جالى فرصة أتكلم عن نفسى،
فعلاً إعمل نفسك بنفسك، أنا لو كنت إستنيت فرصة حد ييجى يكتشفنى كان هيبقى صعب يحصل، لكن أنا عملت فرصتى بنفسى فى أوضتى بالموبايل بتاعى مش بأحسن كاميرا، بأفكارى وصلت لحلم كبير أنا نفسى فيه و هى خطوة كبيره جداً بالنسبالى و قربتنى لحلمى، إصنع الطريق لنفسك بأقل إمكانيات و هتوصل، ربنا بيكافئ أى شخص بيعمل مجهود.
 
و بهذا نكون إنتهينا من الحوار المُمتع مع الشابه الجميله المتألقة كنزى مدبولى، نتمنا لكِ المزيد من النجاح.
سجل معنا أو سجل دخولك حتى تتمكن من تسجيل اعجابك بالخبر
النجمة الصاعدة كنزى مدبولى فى حوار صحفى مع الإعلامية سنديا أيمن

محرر الخبر

مدير الموقع
المدير العام
اعلامى ومقدم برامج

شارك وارسل تعليق

سجل معنا أو سجل دخولك حتى تتمكن من إرسال تعليقك

أخبار مشابهة

بلوك المقالات

الفيديوهات

الصور

http://www.elkhabareg.com/tfr/1911

اهم الاخبار